احتضار

يتهد قلبي واحس جوايا انهيار

لما بالاقي الليل بيخنق ف النهار

حمرة غروب دي ولا لون دم الصباح

مسفوح بأسفلت السما ... وصوت احتضار

اختار سكتك

لو ألف ميت مليون طريق

ممكن تضيق

لو بس طعم الحزن عشش ف السكك

لو ألف ميت مليون طريق

مليان بريق

ممكن يا ضي تصير ظلام

لو يوم ننام ...

نصحى نلاقي الحلم عام

رايح لشط النور .. ولكن

نسمع الصرخة تدوي ف قلبنا

لقيوه غريق

لو ألف ميت مليون طريق

وحصان بيرمح ف السبق

نازل زفير ... طالع شهيق

ممكن نهاية الخط

نسمع صرحتك ... وحصان نفق

لو ألف ميت مليون طريق

رسمت كلام مع الأحلام

الحلم ضاع

والكل باع

عند السؤال

نسمع سكات

والحلم مات

والألف ميت مليون ومليون ضحكتك

صبحت آهات

ما انت ف زمان غير الزمان

ولا ليك مكان

الدمعة تسبق خطوتك

وتراب وطن بايع بينهش جتتك

مش باقي إلا الحلم مرسوم ع الحيطان

والخوف جبان

خايف يقرب يتمسك

ما هو الف ميت مليون عميل دلوا عليه

وبان اللي خان

خبصت عليه نظرة عنيه

وطعم المرار اللي مع الريق يبلعه

وخز الضمير مين اللي يقدر يمنعه

لو ألف ميت مليون حكاية

في المراية

تضحك الأحلام معاك

طب ليه أساك

ياللي الدروب مستنياك

ياللا ابتديها بخطوتك

علّي في سماها ضحكتك

راح اللي راح

والكون براح

فيه ألف سكة وسكة تاني من جديد

غير سكتك

من أين يأتي البحر ؟

من دمعة حرّى

في ليل طويـــــــــــــل بارد

بموقف خزي وندم

أو انكسار...... وحسرة

ومن أين يأتي النهر ؟

من دمعة فرح لنعمة

أو فرج لكربة

والسحاب ؟

من وجه حبيب ... طاهر ... نقيّ

وخل وفيّ

وصاحب عهد .. صادق صامد صابر أبيّ

والنور

من بسمة طفل صغير

والطيور

من همسات تسبيح ودعاء

في هدأة ليل ..ومناجاة خوف ورجاء

والشمس

من الحق

والقمر

من خفق قلب

والخبز

من سنابل عطاء

والحب

من قلب الأم

والشعر

من رفرفة فراشة

ورقرقة جدول نمير

وضوع ورد وزهور

انطباعات

جميل أوي الجو ده .... مفيش شمس والهوا بارد شوية ..ينعشك

الموظفين معظمهم غياب وكأنهم اتفقوا مع الجو يوفروا شوية هدوء .. صاخب

دوشة الهدوء روعة... مزاج عالي أوي ...قدامي مباشرة السما

لا ... عن يميني ...(قدامي شاشة الكمبيوتر ...حتى الأحلام ..الواقع بيضغط علينا فيها ..ما تقول عادي قدامي السما وخلاص خلصت)

كل ما ابص لها القاها لسة صافية وعالية زي ماهي

عمرها ف يوم ما تنزل .. تبص دايما من فوق

رمز

وكل ما الأرض تشدني

عيني تلاحظها ... لسة برضه عالية زي ما انتِ

كل ما في الأمر .. عشرة عمر

مابين سمايا والسحاب

لسة صحاب

ودوشة طيور بيتكلموا عن الأوضاع والأحوال والاقتصاد العالمي والركود والمشكلات الدولية مع بعض الق ..لا كل القضايا الخاصة

لا يعكر على دوشة صوت الطيور الا الهدوء القاتل بتاع كلاكسات ونفير العربات

تمام اللوحة اني عديت على مدرسة ووجدتها ..مجموعات ورود بلدي جميلة اوي ... تبيعها فتاة تقترب كثيرا من صورة الفلاحات في الزمن الكلاسيكي

زمن الطهر والنقاء ...والانجذاب الى السماء والارتباط بها

قبل ظهور عصر الالة والتي تحولت فيها التاء المربوطة الى هاء

وظيفتها الإلهاء عن حقيقة وظيفتنا نحن

خرجنا من خدمة الفكرة (الوحي)

لخدمة الأشخاص (عصبيات وامبراطوريات حاكمة وعائلة وقبيلة)

لخدمة الأشياء(الآلة والجمادات )

المهم مفيش اجمل من قعدة في غيط أو جنينة ف الوقت ده

وتصلي ركعتين ع النجيلة حافي من غير شراب

وجبهتك وانفك تمرغهم في التراب ..الخضرة

ياااااااه كل شحنات عصر الآلة تتفرغ وتتسرب للأرض

وتشم لأول مرة شوية أكسجين بجد وريحة النجيلة

إخص عليك يا دنيا

آخر كلمة قالتها أمي قبل ما تموت

لخصت فيها الحكاية

8:40

بتوقيت جو بديع جدا